Pap
Waor was ik geblaeve? Aoveral was muziek, zei ik de vurrige kier.
Mar is dat ok vur pap altied zoë gewest?
Pap zien laeve haj ok veule ups en downs.
Heej was en kôs van alles. Muziek, sport en ut onderwies.
3 dingen die toch wel zien laeve ien urste ienstansie bepaolde.
Was dirigent, trainer en nie te vergaete onderwieser. En zonder oeit prins te zien gewest zwaaide heej dus wel op veul platse de scepter.
En ut gezin, zien familie, kwam daor ok nog is beej.
Aoveral haj heej verstand van, docht heej zelf. Dat was nie eigewies, ben de gek, dat was WIES.
Mar weej wiete wel baeter! Hebben ut ok nie van enne vremde.
Owlie hoef ik daor eigenlijk nie aover te vertelle. Gillie kende um allemaol en wiete hoe heej ien mekaar zoot.
Wat heej beteikent het, vur de verschillende verenigingen waor heej lid van was, en mit laefde mit hun doen en laote. Ik hoef ze hier nie op te noeme, ze ware vur um allemaol aeve belangriek.
Ieder zoë zien eige herrinnering.
Mar vur os kiender was der wel 1 ding wat iedere kier naor veure kwaam.
Heej was enne vechter, nie kapot te kriege.
De jaore dat os urste mam, Corrie, ziek was en ovverleej hebbe um doen nergaon as enne bokser.
Mar nao angeteld te zien en ien den hoek gezet, kwaam heej hier wer van beej en vocht verder.
Sterker as oeit.
Zien verschillende ziektes en kwaole die heej het motte aoverwinne. Wer angeteld, effe ien den hoek, en wer verder. En dat dukker as ens.
En ok hier kwaam heej sterker uut.
Ien de tussenliggende jaore zien kiender, weej dus, goed probiere af te leveren. Ok hier zal heej wel wat tikke an aover hebbe gehalde.
En de kleinkiender verwelkomme, waor heej ontzettend van hield. Altied geïnterressierd ien de dingen die zeej ondernome. Of ut now schôl, werk, sport, muziek, reize of wat dan ok was. Heej volgde ze zelfs op socialmedia. Facebook, appen en alle sites waor heej mar wat op kos viende van hun. Heej genoot daor vol trots ientens van.
En wer sloege ze um ner. Now was ut os twedde mam, Gonnie, die heej af mos gaeve. Naodat heej jaore vur ur gezurgd haj en hielp mit ut drage van ur ziekte.
En ok dizze kier stond heej op nao zwaor angeteld te zien gewest. De litteikens begosse echter toch wel erg zichbaar te werre.
Heej halde nog wat moed uut ut feit dat heej vur den urste kier aovergrötvader zuuj werre. Prachtig vond ie dat. Helaas kan heej dit nie mer mit make.
En ok nie te vergaete zien bakkunsten. Iedere zaoterdag stond ie vort an den anrecht um enne taart o.i.d. te bakken. En dat kos heej ok nog is verrekkes goed.
Mar daor was ie wer, den mit de linkse directe. Heej wier vol gerakt en dizze kier ware 3 telle en effe den hoek ien, nie genoeg. Heej kreeg ze alle 10.
Heej kos nie mer verder, vond ut goed en noom zien verlies.
Heej was klaor.

Bas